دیگه بهار روستا بو ندارنه همه بوردنه روستا سو ندارنه

دیگه بهار روستا بو نِدارنه

دیگه بهار روستا بو نِدارنه ................................. همه بوردنه روستا سو نِدارنه

مِه دل خانه بِنالم روستاسِه ................................ وِنه مظلومی و آب و هواسِه

وِنه خوبی پائین ، بالا ملِه ................................ وِنه سوایی سر ونگ طِلاسِه

وِنه صفا خوبی گُم بَهیه ................................ خرابی با كِلاج همگون بَهیه

همگی بوردنه خوبی بَمرده ................................ بدون نومو ونه روزی نَمرده

همه سر اشتنه دشت و نپاره ................................ كِلوم و خِنه وگَندم جاره

آپارتمان وشونه جا بَهیه ................................ آسانسور، پلكوم راه بَهیه

لامپ و مهتابی و گازی چه خواره ................................ فنر و لمپای سو چنده تاره

دیگه بهار روستا بو نِدارنه ................................ همه بوردنه روستا سو نِدارنه

زبون مازنی فارسی بَهیه ................................ زَمونۀ مردم پارتی بَهیه

پلاستیكی كلوش دیگه كی كِنده ................................بخاری هیمه ای، هیمه كی كِنده

دیگه كی داز و تور رهه جا شونه ور ................................ دیگه كی تپه سر صدا دِنه سَر

دیگه كی هیمه جا پلا پَجنه ................................ دزِندون و ماشه په تَجنه

گازو پیک نیک و فندک چنده خاره ................................ تَشهِ دی چه چیه شهربِلاره

دیگه بهار روستا بو نِدارنه ................................ همه بوردنه روستا سو نِدارنه

شلوار پینه بَزه رِ كی كنده ................................ چوقا ، كلوش و چَكمه ره كی كنده

بوین چه جور ، چه چییا بهیه مد ................................ دیگه بیته هیمه هم نکنده دوو

مه دل تنگ هائیته ونگ طلاسه................................ سیكای سروصدا،میچكا ، تیكا سه

بزن جان لَلِه چی لَلِه وارِه................................ بخون جان بِرار من تِه بِلارِه

بزن لَلِه، دل غم تازه بَوِّه ................................ چند سال دوری دِل جا سازه بَوِّه

لَلِه هم مه واری برمه گلیه ................................ ونه حال مِه حال واری پلیه

گنه بهار روستا بو نِدارنه ................................ همه بوردنه روستا سو نِدارنه

كجه بورده كِته كوله ی بازی ................................ كجه بورده محله های شادی

چی بیه چیلکا ، کتین جرسی ................................چی بیه لمه ، پوست تخت کلسی

دیگه كاتی دَنیه بوم بلوسَر................................ دیگه کنده دَنیه بخاری وَر

همه ره بورده یاد اون تن شرون ها ................................ سونا ، استخر بمو سر زبون ها

بهیه تن شرون چاله ها پر ................................ چشمه ی او شه جا هم بهیه سِر

كِنسه بهوم این نامهربونی ................................ كِنسه هاكِنم لا لا زِبونی

نَنو و گره دیگه بورده از یاد ................................ نا اون نَنو، اصالت بورده بَر باد

دیگه بهار روستا بو نِدارنه ................................ همه بوردنه روستا سو نِدارنه

بهیم بوریم مله ی دل نِخواره ................................ بویم شِه جان وطن بِلاره

آیِشه بِنه رِه کِمبی زراعت ................................ اگه بَویم علی کِنده شِفاعت

بوریم چِشمه دِل رِه پاک هاكنیم ................................ كدورِت و بدی رِه خاك هاكنیم

بوریم روستا رِه آبادی هاکنیم ................................ همه جا ره پِر از شادی هاکنیم

بهین بوریم که مله روح بهیره ................................همه بهین تا مله سو بهیره

بلبل ناله هسته شعر قربون ................................ بهین بوریم که بعد بونی پشیمون

قربان عموزاده از سوادکوه روستای کلاریجان 18/9/1373